សិស្សរៀន នៅវិទ្យាល័យ ១០មករា ១៤០នាក់ ត្រូវបាន ដកបេក្ខភាព មិនឱ្យប្រឡង សញ្ញាប័ត្រ បាក់ឌុបឆ្នាំនេះ
05-August-2016 | ដោយ មែន កំសត់
ខេត្តសៀមរាប៖ បន្ទាប់ពីល្ងាចថ្ងៃទី៣ រហូតដល់ព្រឹកថ្ងៃទី៤ខែសីហា នាយកវិទ្យាល័យ ១០មករាបានបិទផ្សាយ បញ្ជីឈ្មោះ ដកបេក្ខភាពសិស្ស ចំនួន១៤០នាក់ មិនឱ្យចូលរួម ប្រឡង សញ្ញាប័ត្របាក់ឌុប នៅថ្ងៃទី២២ខែសីហាខាងមុខបានទេ។
មន្ទីរអប់រំយុវជននិងកីឡា ខេត្តសៀមរាប បានរៀបចំមន្ត្រីមួយចំនួន ហើយបញ្ជូន ទៅជួបជាមួយ នាយកវិទ្យាល័យ ១០មករា ដើម្បីជជែក ស្វែងរកមធ្យោបាយ ជួយឱ្យ សិស្សសាលាខ្លះ ដែលបាត់បង់បេក្ខភាព ប្រឡងយក សញ្ញាប័ត្របាក់ឌុប ឆ្នាំនេះ ឱ្យមានសិទ្ធិចូលប្រឡងវិញបាន។ ជំនួយការរបស់ នាយកវិទ្យាល័យ ១០មករា គឺលោក ប៊ី ប៊ុន សុផុន្នី។ លោកមានប្រសាសន៍ កាលពីព្រឹកថ្ងៃព្រហស្បតិ៍ ទី៤ ខែសីហា នៅក្នុងទីចាត់ ការវិទ្យាល័យនោះថា ការដែលដក បេក្ខភាពសិស្ស ១៤០នាក់ មិនឱ្យចូលរួម ប្រឡងបាក់ឌុប គឺយោងទៅលើ សេចក្តីណែនាំ របស់ក្រសួង អប់រំយុវជននិងកីឡា ដែលបានចេញ ប្រកាសរួចហើយ។
ជំនួយការដដែល បញ្ជាក់ថាក្រសួងអប់រំ យុវជននិងកីឡា បានណែនាំថា រាល់សិស្សទាំងឡាយណា ដែលបានអវត្តមាន ក្នុងពេលសិក្សា ដោយមានច្បាប់ ចំនួន៣០ដង ព្រមទាំងឈប់ ទោះជាមានច្បាប់ និងអត់ច្បាប់ចំនួន៤៥ដង គឺត្រូវដកបេក្ខភាពមិនឱ្យប្រឡងសញ្ញាប័ត្រ បាក់ឌុបទេ។
លោក អះអាងទៀតថាសិស្ស១៤០នាក់ ដែលវិទ្យាល័យ១០មករា បានដកបេក្ខភាព មិនឱ្យប្រឡង សញ្ញាប័ត្រ បាក់ឌុបឆ្នាំនេះ ភាគច្រើន គឺមិនបានដាក់ ពាក្យសុំប្រឡង និងធ្លាក់ពិន្ទុមធ្យម ភាគប្រចាំឆ្នាំ។ បើទោះបីជាអ្នក គ្រប់គ្រងវិទ្យាល័យ១០មករា អះអាងថាការ ដកបេក្ខភាព សិស្សរហូត ដល់ទៅ១៤០នាក់ គឺធ្វើតាមការណែនាំ របស់ក្រសួងអប់រំ យុវជននិងកីឡាក៏ដោយ ក៏នៅកន្លែង ដែលបិទផ្សាយបញ្ជីឈ្មោះ ដកបេក្ខភាពសិស្សនោះ មិនមានបិទផ្សាយសេចក្តីណែនាំ របស់ក្រសួង ជុំវិញរឿងនោះទេ ហើយនៅពេលដែល អ្នកយកព័ត៌មាន ជួបសម្ភាសន៍ ក៏មិនមានឃើញ បង្ហាញពីឯកសារ ណែនាំរបស់ ក្រសួងនោះដែរ។
នៅកន្លែងបិទផ្សាយ បញ្ជីដកបេក្ខភាព សិស្ស១៤០នាក់ មិនឱ្យ ប្រឡងបាក់ឌុបនោះ គឺមានសិស្សប្រុស-ស្រី ជាច្រើន បានមកពិនិត្យមើលឈ្មោះ របស់ពួកគេ។ នៅពេលដែលឃើញ ថាឈ្មោះរបស់ ខ្លួនមិនបាន ប្រឡងបាក់ឌុបហើយ គឺពួកគេបង្ហាញ ទឹកមុខក្រៀមក្រំ ក៏ប៉ុន្តែមិន មានសិស្សណាម្នាក់ ដែលគ្មានឈ្មោះប្រឡងនោះ ហ៊ានធ្វើសម្ភាសន៍ ជាមួយអ្នកសារពត៌មានឡើយ។
គ្រូបង្រៀនម្នាក់ ដែលសុំមិន បញ្ចេញឈ្មោះ មានប្រសាសន៍ប្រាប់តាមទូរស័ព្ទថា វិទ្យាល័យ១០ មករា ដែលដកបេក្ខភាពសិស្ស រហូត១៤០នាក់ មិនឱ្យប្រឡងបាក់ឌុបឆ្នាំនេះ គឺជាចំនួនច្រើន បំផុតដែល មិនធ្លាប់មានទេ តាំងពីមុនមក។ គ្រូបង្រៀនដដែល ព្រួយបារម្ភអំពីអនាគត យុវជន ដែលមិនបានចូល ប្រឡង សញ្ញាប័ត្របាក់ឌុបទាំងនេះ ហើយអំពាវនាវឱ្យ ក្រសួងអប់រំយុវជននិងកីឡា គួរពិនិត្យរឿងនេះឡើងវិញ។ មន្ទីរអប់រំ យុវជននិងកីឡា ខេត្តសៀមរាប ក៏បានសំដែងការព្រួយបារម្ភ ចំពោះអនាគតយុវជន ដែលមិនបានចូល រួមប្រឡងបាក់ឌុបទាំងនោះ ដូចជាគ្រូបង្រៀនខ្លះដែរ។
ប្រធានមន្ទីរអប់រំយុវជននិងកីឡា ខេត្តសៀមរាប លោក សយ ទិត្យាវង្ស មានប្រសាសន៍ថា លោកទើបតែបាន ទទួលរបាយការណ៍ ស្ដីពីវិទ្យាល័យ ១០មករា ដែលដកបេក្ខភាពសិស្ស ១៤០នាក់ មិនឱ្យប្រឡងបាក់ឌុប ក្នុងឆ្នាំនេះ ។ លោក សយ ទិត្យាវង្ស យល់ឃើញថាវិទ្យាល័យ ១០មករា ដែលដកបេក្ខភាពសិស្ស មិនឱ្យប្រឡង បាក់ឌុបឆ្នាំនេះ គឺច្រើនពេក ក៏ប៉ុន្តែលោកនៅ មិនទាន់វិនិច្ឆ័យថា យ៉ាងណានៅឡើយ គឺនៅរង់ចាំការស្រាវជ្រាវ របស់មន្ត្រី ដែលបញ្ជូន ឱ្យទៅជួបជជែក ជាមួយនាយកសាលា១០មករាជាមុនសិន។
មន្ត្រីមន្ទីរអប់រំយុវជននិង កីឡាខេត្តសៀមរាប ឱ្យដឹងថា មិនមែនមានតែ វិទ្យាល័យ១០មករា តែមួយប៉ុណ្ណោះទេ ដែលបានដកបេក្ខភាពសិស្សខ្លះ មិនឱ្យប្រឡងបាក់ឌុប ក្នុងឆ្នាំនេះ គឺមានវិទ្យាល័យជាច្រើនទៀត នៅក្នុងខេត្តសៀមរាប ក៏បានធ្វើដូចគ្នាដែរ។ ទោះជាយ៉ាងណា មន្ត្រីមន្ទីរអប់រំយុវជននិងកីឡា មិនអាចបញ្ជាក់បានទេថា តើរហូតមកដល់ពេលនេះ នៅតាមវិទ្យាល័យជាច្រើន ក្នុងខេត្តសៀមរាប បានដកបេក្ខភាពសិស្ស មិនឱ្យប្រឡងបាក់ឌុបឆ្នាំនេះ ចំនួនសរុប ប៉ុន្មាននាក់ទេ ពីព្រោះ នាយកវិទ្យាល័យជាច្រើន នៅមិនទាន់បញ្ជូនរបាយការណ៍ អំពីរឿងនេះ មកដល់ដៃមន្ទីរអប់រំ ទាំងអស់នៅឡើយ៕
ចំនួនអ្នកទស្សនា
- ថ្ងៃនេះ2691
- ម្សិលមិញ4911
- សប្តាហ៍នេះ20261
- ខែនេះ2691
- ឆ្នាំនេះ245931
- សរុប20688387